Eins og margir kannski vita er 19.maí er alþjóðlegur IBD dagur og tákn hans er fjólublá slaufa. IBD ( Inflammatory Bowel disease) er notað sem samheiti yfir langvinna bólgusjúkdóma í meltingarvegi; Crohn´s sjúkdóm og Colitis Ulcerosa. Rúmlega 50 lönd í 5 heimsálfum taka þátt í deginum með ýmsum hætti til að vekja athygli á sjúkdómunum, hvetja til rannsókna og styðja við yfir 10 milljón manns sem lifa með IBD í heiminum í dag. Til að skapa vitundarvakningu standa CCU samtökin fyrir netherferð í maí mánuði og hvetjum við alla til að vera dugleg að deila færslunum svo útbreiðslan verði sem mest. Að auki birtast auglýsingar þann 19. maí, bæði í Morgunblaðinu og Fréttablaðinu. Við þökkum kærlega öllum sem tóku þátt í verkefninu; félögum CCU sem mættu í myndatöku, Kristvini myndasmið í E8 og ekki síst strákunum í Webmodesign sem settu upp herferðina á fésbókinni og gáfu alla sína vinnu við verkefnið !
Næsti fræðslufundur verður fimmtudagskvöldið 5. apríl og er sameiginlegur með Stómasamtökunum. Fyrirlesari verður Pálmar Ragnarsson íþróttaþjálfi. Hann er meðal annars með BS í sálfræði og ætlar að vera með fyrirlestur um jákvæð samskipti og að setja sér markmið. Einnig ætlar hann að tala um hvernig við getum reynt að takast á við erfiðleika með jákvæðu hugarfari. Það getur oft á tíðum reynst erfitt þegar verið er að glíma við langvinna sjúkdóma. Fundurinn verður í sal Krabbameinsfélagsins í Skógarhlíðinni, 1. hæð og hefst kl. 20:00. Kaffi verður á könnunni og eitthvað gott með. Vonumst til að sjá sem flesta :-)
Aðalfundur CCU fór fram 20. febrúar síðastliðinn. Ný stjórn var kosin og stjórnarmenn eru:
Edda Svavarsdóttir, Elísabet Sverrisdóttir, Hulda B. Þórðardóttir og Sóley Veturliðadóttir. Varamenn eru: Hrefna B. Jóhannsdóttir og Sigurborg Sturludóttir. Rakel Ýr Aðalsteinsdóttir er tengiliður stjórnar við ungliðahóp.
Félagsgjöld voru ákveðin óbreytt kr. 2000,- Skýrsla stjórnar um starfsemi síðasta árs er komin inn á heimasíðuna í flipanum "um samtökin"
Enn vantar einn í stjórn til þess að hún sé fullmönnuð.
Næsti fræðslufundur CCU verður á Akureyri fimmtudagskvöldið 1. febrúar. Fundurinn verður í sal Krabbameinsfélagsins, Glerárgötu 24 og hefst kl. 20:00. Fyrirlesari er Anna Lind Traustadóttir meistaranemi í næringarfræði. Eitthvað létt og gott verður í boði og við vonumst til að sjá sem flesta sem búa á Akureyri og nágrenni.
Næsti fræðslufundur verður þriðjudagskvöldið 7. nóvember. Að þessu sinni er það Guðrún Darshan, hómópati og kundalini jógakennari sem ætlar að koma til okkar. Hún mun m.a. miðla af visku sinni hvernig djúpslökun, öndun og hugleiðsla getur hjálpað okkur í amstri dagsins. Kundalini jóga kemur jafnvægi á innkirtlakerfið, taugakerfið og ónæmiskerfið auk þess að styrkja huga og líkama. Það kennir okkur að eiga nærandi samband við okkar innri mann. Fundurinn er í sal Vistor, Hörgatúni 2 Garðabær og hefst kl. 20:00
Næsti fræðslufundur hjá okkur verður miðvikudagskvöldið 27. september og hefst kl. 20:00.
Þorbjörg Hafsteinsdóttir er hjúkrunarfræðingur, næringarþerapisti og markþjálfi. Síðustu 17 ár hefur hún sótt fræðslu og endurmenntun í hagnýtri lækningarfræði og -næringu hjá “Institute for Functional Medicine” i USA. Hún sótti einnig nám í endurmenntun Háskóla íslands árið 2014 í “Cognitive Behavior Therapy and mindfullness” og sama ár útskrifaðist hún sem yogakennari frá Yoga Shala Reykjavík.
Hún hefur skrifað heilsu- og næringarbækur sem miða m.a. að því að tengja saman mataræði, heilsu, heilbrigði og geðheilsu þannig að við eigum örugglega von á fróðlegum fyrirlestri.
Fundurinn er í sal Vistor, Hörgatúni 2 Garðabæ. Að venju verður kaffi á könnunni og eitthvað létt og gott með. Hlökkum til að sjá ykkur sem flest.
Takið þátt í 19. maí með okkur en hann er alþjóðlegi IBD dagurinn. Til að halda upp á daginn og vekja um leið athygli almennings á hvað hann stendur fyrir viljum við hvetja alla til að taka þátt í verkefninu "Fjólublár Maí". Skráning fer fram á fésbókarsíðunni okkar. Við sendum ykkur slaufur, þið límið þær á áberandi staði, takið mynd, setjið á netið og merkið með #ibddayiceland og #worldibdday
Ætlar þú að vera með ?
Næsti fræðslufundur verður fimmtudagskvöldið 6. apríl og er sameiginlegur með Stómasamtökunum. Birna Ásbjörnsdóttir sem er með meistaragráðu í næringarlæknisfræði frá University of Surrey í Bretlandi, kemur til okkar og mun fjalla um örveruflóru þamanna í tengslum við bólgusjúkdóma. Rannsóknir hafa leitt í ljós að ákveðnir genaþættir, umhverfisþættir og röskun á örveruflóru þarmanna hafa áhrif á ónæmiskerfið og þar með þróun sjálfsónæmissjúkdóma og langvinnar bólgu í þörmum. Birna mun fara yfir hvað getur raskað þarmaflórunni og hvað er hægt að gera til að stykja og efla hana og þar með ónæmiskerfið.
Fundurinn hefst kl. 20.00 og verður í húsi Krabbameinsfélagsins í Skógarhlíð, 1. hæð til hægri. Kaffi verður á könnunni og allir eru velkomnir.
Aðalfundur CCU verður fimmtudagskvöldið 9. febrúar næstkomandi. Eftir hefðbundin aðalfundarstörf kemur Una Emilsdóttir læknir til okkar. Hún hefur verið að halda fyrirlestra um ónæmiskerfið og mikilvægi þess í sambandi við króníska sjúkdóma. Una mun m.a. fjalla um efni í nærumhverfi okkar sem geta bælt ónæmiskerfið, mataræði sem hefur mikil áhrif á meltingarveginn og getur haft sitt að segja varðandi bólgusjúkdóma.
Þarmaflóran gegnir stóru hlutverki í líkamanum og mikilvægt er að halda henni í góðu ásigkomulagi.
Fundurinn fer fram í sal Vistor, Hörgatúni 2 Garðabæ og hefst kl. 20.00. kaffi verður á könnunni og ljúfar veitingar með í tilefni aðalfunds. Sjáumst hress :)
